Kategori: Tíðindi

Í dag vórðu nøkur av starvsfólkunum hjá Norðoya Bú- og Heimatænastu kannað fyri COVID-19. Kanningarnar verða gjørdar í samstarvi við Heilsufrøðiligu Starvsstovuna og Pál Weihe, yvirlækna, og eru serliga ætlaðar teimum starvsfólkum, sum búgva saman við avvarðandi, ið eru í heimasóttarhaldi, t.d. makar ella onnur, ið starvast uttanlands ella eru uttanlands í lestrarørindum.

Fyri at verja eldru borgararnar og fyri at bøta um korini hjá starvsfólkunum hevur stýrisformaðurin fyri Norðoya Bú- og Heimatænastu, Jógvan Skorheim, eftir tilmæli frá leiðsluni í NBH og Pál Weihe, tikið avgerð um, at bjóða starvsfólkum í NBH at verða kannað fyri COVID-19.

– Eldri borgarar, sum NBH varðar av, eru í serligum vanda fyri at gerast álvarsliga sjúkir, um teir verða smittaðir við COVID-19. Hetta eru starvsfólkini vitandi og óttafull um, og hava tí víst sera stórt umhugsni og stóra ábyrgd, har tey hava avmarkað síni sosialu sambond enn meira, enn mælt verður til.

– Vit fegnast um góðu gongdina í Føroyum, nú eingin tilburður av COVID-19 er staðfestur seinasta góða mánaðin. Tó er framvegis vandi fyri, at smittan kemur aftur til Føroyar úr útlondum. Hetta er orsøkin til, at avgerð er tikin um, at bjóða starvsfólkum í NBH at verða kannað fyri COVID-19, sigur Jógvan Skorheim.

Tilboðið skal síggjast sum eitt ískoyti til kanningarmøguleikarnar umvegis kommunulæknaskipanina, har fólk við sjúkueyðkennum kunnu venda sær.

Eisini er tilboðið til borgarar, sum fáa tænastur frá NBH, og sum ikki hava sjúkueyðkenni, men hava samband við avvarðandi, ið skulu í heimauppihald. Hesir borgarar kunnu venda sær til avvarðandi deildarleiðarar.

Tá Føroyar um miðjan mars mánað fór niður í ferð fyri at forða fyri, at COVID-19- smittan verður spjadd, hevði tað eisini við sær, at øll fyriskipað felags tiltøk fyri eldri borgarar, sum eldratænasturnar vanliga veita, vórðu avlýst, og bústovnar vórðu stongdir fyri allari vitjan.

Nú smittutrýstið í samfelagnum er minkað munandi, fara eldraøkini, eins og samfelagið annars, varisliga at økja virksemið aftur. Kommunufelagið hevur tí, saman við teimum 8 eindunum, sum umsita eldraøkið, gjørt tilmæli um, hvussu hetta kann fara fram.

Tilmælini vísa á, hvussu virksemið á eldraøkjunum/heimatænastunum kann setast í verk aftur. Grundarlagið er verandi støða, nú tamarhald er á smittuni við COVID-19. Broytist smittutrýstið, og tamarhald ikki longur er á smittuvegunum, verður neyðugt at herða átøkini aftur.

Mælt verður til, at átøk og tænastur stig fyri stig og varisliga verða sett í verk aftur eftir einum skipaðum leisti, har atlit verður havt at almennu leiðreglunum um sosialan atburð og reinføri.

Tilmælini eru í stuttum at:

• Lata upp aftur fyri, at næstu avvarðandi aftur kunnu vitja búfólk á røktarheimum og sambýlum. Í fyrstani er neyðugt bert at loyva heilt fáum, og teimum somu avvarðandi at vitja.
  Somuleiðis verður møguligt hjá búfólki at fara av heiminum við avvarðandi, treytað av at tey í fyrstu atløgu bert eru saman við hesum somu avvarðandi.
• Persónligar tænastur til búfólk, so sum fótarøkt, tannrøkt, hárfríðkan o.a. kunnu byrja aftur varisliga. Hvussu hetta verður gjørt, verður ymiskt frá øki til øki, tí umstøðurnar at skipa hesar tænastur eru ymiskar. Tað ræður um at fylgja almennu leiðreglunum um sosialan atburð, handreinføri, reingerð og eisini verndarútgerð, tá tað er neyðugt.
• Talið av borgarum til umlætting kann við tíðini økjast stigvíst, treytað av at virksemið verður skipað, soleiðis at pláss er fyri at fylgja almennu tilmælunum um frástøðu.
• Fyribyrgjandi tænastur, so sum venjing, rehabilitering og samdøgursrehabilitering, sum kunnu stimbra likamligu og sálarligu heilsuna og betra trivnaðin, verða varisliga veittar aftur eftir skipaðum leisti, ið tekur atlit til áhaldandi at forða fyri smittu. Somuleiðis verður flutningur skipaður til hesar tænastur.
• Visiterað dagtilboð kunnu stigvíst byrja aftur, í tann mun fysisku karmarnir og starvsfólkatilfeingið loyva tí. Hetta verður gjørt soleiðis, at borgarar við størstum tørvi fyrst fáa tænastuna í boði.
  Opin tilboð um dagtilhald, frítíðarvirksemi, venjingar o.a. kunnu, har tað ber til, verða skipað sum visiterað tilboð.
• Fyribyrgjandi heimavitjanir kunnu byrja aftur. Eisini her verða teir borgarar raðfestir fremst, ið vantandi hava størstan tørv á tænastum frá heimatænastuni/eldratænastuni.
• Mælt verður til heilt at bíða við øllum virksemi inni á búeindunum, sum krevur, at onnur fólk koma inn á heimini, so sum andaktum, barnagarðsvitjanum, vitjanarvinum, framførslum o.a. Hesi tiltøk kunnu framhaldandi verða skipað uttandura.

 

Um 14 dagar er ætlanin at meta um, hvørt ráðiligt er at víðka enn meira um tænastur og vitjanir.

Føroyar er helst millum einastu samfeløg í heiminum, har tað hevur eydnast at hildið koronasmittuni frá eldraøkinum; men hetta hevur bert eydnast, tí avvarðandi hava víst neyðugt fyrivarni, og tí at starvsfólk hava víst neyðugan professionellan hugburð. Vón okkara er, at somu fyrivarni og sami professionelli hugburður fara at vera til staðar, nú eldraøkið varliga letur upp aftur.

Líkt er til, at tey eldru í næstum kunnu fáa vitjan og ein meira innihaldsríkan gerandisdag, tá ið nú eldraøkið varliga verður latið upp.

Norðoya Bú- og Heimatænasta er, í tøttum samstarvi við Koronaráðgevingina og hinum eldrasamstørvunum, í gongd við at samskipa, hvussu eldraøkið stigvíst kann latast upp aftur.

Somuleiðis verður ætlan løgd fyri umlættingum, samdøgurðsrehabiliteringum, venjingum og dagtilboðum annars.

Búfólkini á Heiminum við Vágna fingu eina heilt serliga uppliving fyrrapartin í gjár, tá ið Hallur Joensen framførdi nøkur løg fyri teimum, sum í hesum døgum eru serliga hart rakt av korona-støðuni, nú møguleiki ikki er fyri, at fáa vitjan frá sínum avvarðandi.

Útikonsertin var skipað í samstarvi millum Hall Joensen og Góðan morgun Føroyar (GMF), sum eisni var framvið og tosaði við Hall, Katrina Hansen, deildarleiðara á Heiminum við Vágna, og Turið Fuglø, sum er búsitandi á heiminum.

Hallur Joensen greiddi frá í GMF sendingini, at endamálið við framførsluni var at geva búfólkunum eina heilt serliga uppliving, og tað var Turið Fuglø ógvuliga fegin um. Turið segði m.a,. at hon næstan fór at dansa, meðan hon sang til góðu tónarnar hjá Halli. Turið greiddi somuleiðis frá, at hóast íkomna korona-støðan er tung, so er tað fantastikst at kenna, at starvsfólkini eru so fitt.

Fleiri av búfólkunum vóru komin út at njóta fagra veðrið og góðu tónarnar frá Halli, og tey, sum ikki hattaðu sær útum, høvdu sett seg tætt við vindeyguni, soleiðis at tey eisini kundu lýða á.

Samrøðan frá Heiminum við Vágna í GMF kann hoyrast við at trýsta á leinkjuna her.

Orsaka av serligu umstøðunum, nú Koronavirus ger um seg, hava vit brúk fyri tínari hjálp.

Ert tú lesandi innan heilsufakliga økið ella fyrrverandi starvsfólk vilja vit fegin hoyra frá tær.

Somuleiðis hava vit tørv á hjálp til køksarbeiði og reingerð, og vilja vit fegin hoyra frá fólki, sum kunnu hjálpa á hesum økjum.

Um tú kanst hjálpa okkum ert tú vælkomin at skriva ein teldupost á: nbh@nbh.fo

Norðoya Bú- og Heimatænasta hevur sett nøkur tiltøk í verk, soleiðis at NBH best kann fyribyrgja og avmarkað smittuvandan av Covid19. Tiltøkini, sum eru sett í verk, eru fyribils galdandi frá fríggjadegnum 13. mars til fríggjadagin 8. mai.

Búplássini á eldraøkinum stongja fyri vitjandi
Fyri at verja okkara eldru borgarar á eldraøkinum verður stongt fyri vitjandi á øllum bústovnum hjá Norðoya Bú- og Heimatænastu. Í átrokandi førum kunnu avvarðandi venda sær til viðkomandi leiðara, har onnur avtala kann verða gjørd.

Umlætting
Norðoya Bú- og Heimatænasta tekur ikki nýggjar borgarar til umlætting.

Telefonavgreiðsla hjá Norðoya Bú- og Heimatænastu
Telefon nr. 793400 hjá Norðoya Bú- og Heimatænastu svarar yrkadagar frá kl. 8.00 – 15.00.

Kjatt-linja í boðklivanum á facebook
Starvsfólk hjá Klaksvíkar kommunu og Norðoya Bú- og Heimatænastu og allir borgarar í kommununi fáa møguleika at seta spurningar, sum viðvíkja átøkum hjá Klaksvíkar kommunu í samband við Covid19. Hesir spurningar kunnu setast í boðklivanum hjá Klaksvíkar kommunu á facebook, og verða svaraðir eftir besta førimuni

 

Norðoya Bú- og Heimatænasta (NBH) avlýsir øll tiltøk, har nógv eldri fólk savnast, fyri at verja eldri borgarar ímóti Corona smittuvandanum.

Jógvan Skorheim, stýrisformaður í NBH, sigur, at tað hevur stóran týdning, at serlig atlit verða tikin til okkara eldru borgarar næstu tvær vikurnar.

-Ven og Virka er staðsett á Sambýlinum á Heygnum, har bæði búfólk og eldri uttanífrá venja dagliga, men fyri at verja búfólkini á Sambýlinum best, so er neyðugt at avmarkað tilboðið soleiðis, at tað bert eru búfólk á Sambýlinum, sum eru til endurvenjing, ið fáa atgongd til Ven og Virka. Aðrar venjingar verða fyribils avlýstar, sigur Jógvan Skorheim.

-Dagtilhaldið Sóljan er eitt vælvitjað tilboð, har fleiri eldri eisini savnast til ítriv og hugna nakrar ferðir um vikuna, men næstu tvær vikurnar verður Dagtilhaldið Sóljan eisini stongt.

-Norðoya Bú- og Heimatænasta fylgir sjálvsagt gongdini neyvt og er til reiðar at tillaga virksemið og mannagongdir, um heilsumyndugleikarnir koma við nýggjum tilmælum, sigur Jógvan Skorheim.

Í Norðoyggjum eru nógv tiltøk, sum verða fyriskipaði av virknum eldri. Bæði Virkishúsið Smæran og pensjónistafelagið Hugni skipa regluliga fyri tiltøkum fyri bæði menn og kvinnur, men Brúkararáðið í Smæruni og pensjónistafelagið Hugni hava í samráð við leiðsluna í NBH boðað frá, at næstu 14 dagarnar verður heldur onki virksemi í kjallarahæddini í Sambýlinum á Heygnum, har bæði Smæran og Hugni hava sítt vanliga virksemi.

Staðfest er, at Corona virus, Covid19, er komið til Føroyar, og tað er tí umráðandi at áseta og fylgja greiðum reglum til tess at verja okkara gomlu og sjúku borgarar.

Fyri at verja tey ímóti hesi smittu, sum búgva í Sambýlinum á Heygnum, og sum eisini lutvíst venja í Ven og Virka, verður Ven og Virka fyribils latið aftur fyri øðrum enn teimum, sum búgva í bygninginum.

Jógvan Skorheim, stýrisformaður í NBH, sigur, at eftir at tað er staðfest, at Corona virus, Covid19 er komið til Føroyar, so eiga vit at gera alt fyri, at verja okkara gomlu og sjúku borgarar. Hetta er serstakliga galdandi fyri eldraøkið, og tí ger leiðslan í NBH alt fyri at fylgja øllum teimum reglum og fyrivarnum, sum landsmyndugleikarnir seta í verk.

– Leiðslan í NBH fylgir neyvt við á hesum øki, sum er alneyðugt, tí í løtuni kunnu broytingar henda, sum krevja nýggj átøk, og leypandi verða mannagongdir settar í verk, samstundis sum strammað verður upp kring verandi mannagongdir, til tess at verja búfólk og brúkarar hjá NBH ímóti Covid19, sigur Jógvan Skorheim.

Ein av nýggju mannagongdunum er, at um ein hevur verið og ferðast í teimum londum sum www.sst.dk og www.um.dk frámæla ferðandi at vitja, skal viðkomandi ikki koma á vitjan á eindunum hjá NBH í 14 dagar eftir heimkomudag til Føroyar. Hetta er eisini galdandi, um ein hevur havt vitjan av fólki, sum hava verið og ferðast í útsettum londum.

Jógvan Skorheim, stýrisformaður, sigur, at hetta sjálvandi kann seta avmarkingar fyri, at avvarðandi kunnu vitja á bústovnum, um tey hava verið og ferðast, men eftir boðum frá fremstu fakligheitini hjá landsmyndugleikunum so eru hesi og onnur átøk neyðug til tess at verja okkara eldru og veiku borgarar.

– Eg vil heita á øll um at vísa varsemi á hesum øki og virða ásettar mannagongdir í umhugsni fyri okkara eldru borgarum.

Eldraráðið í Norðoyggjum hevur regluligar fundir við leiðsluna í NBH, har ymisk mál verða viðgjørd. Eldraráðið hevur m.a. víst á, at tørvur er á at fáa neyðstreym í búeindirnar hjá NBH. Hesum ynski hevur stýrið í NBH gingið á møti, og hevur sett fyrstu neyðstreymsskipanina upp á Sambýlium á Heygnum.

Neyðstreysskipanin er sjálvkoyrandi, og merkir hetta, at tá ið streymurin fer, so verður Sambýlið á Heygnum ikki merkt av hesum, tí tað ganga einans trý sekund frá tí, streymurin fer, til neyðstreymsskipanin tekur við. Tá tangin er fullur, kann neyðstreymsskipanin virka upp til 24 tímar, men eisini longur, um tangin gerst tómur, og meira verður fylt á.

Gerda Absalonsen, sum í løtuni er virkandi forkvinna, sigur, at hendan íløgan hevur stóran týdning fyri Eldraráðið.

-Hetta er eitt ynski, sum vit hava havt leingi, og tí er tað stuttligt hjá okkum at uppliva, at hetta nú er veruleiki. Eg haldi eisini, at hetta átti at givið fleiri mót til at stilla upp til komandi val í heyst, tá Eldraráðið skal skipast av nýggjum, tí í Eldraráðnum gera vit mun, sigur Gerda Absalonsen.

Neyðstreymsskipanin kostaði væl minni, enn mett varð av fyrstan tíð, og tí er støða eisini tikin til, at sama skipan skal setast til á Heiminum við Vágna.