Seinastu tveir dagarnir hava verið nakað øðrvísi hjá búfólkunum á Norðoya Ellis- og Vistarheimi, nú kaninungarnir Rósa og Blóma eru fluttar inn.

Diana Ó. Johannesen, deildarleiðari, staðfestir, hvussu lívsjáttandi tað hevur verið at síggja móttøkuna, nú starvsfólkini hava tikið stig til at fáa kaninir sum kelidjór.

– Gransking vísir, at kelidjór eru serliga góð fyri eldri, sum t.d. búgva á einum røktarheimi, og aftaná bert tveir dagar hava vit sæð, hvussu stóra umsorgan búfólkini hava fyri kaninunum.

– Umsorgan er ein grundleggjandi tørvur hjá øllum menniskjum, og er hetta komið heilt týðiliga til sjóndar hesar dagarnar. Búfólkini hava givið kaninunum navn, og verða tær væl og virðiliga kíndar. Eisini verður prátað við kaninirnar, umframt at búfólkini eru sera uppmerksom, um kaninirnar fáa nokk at eta.

Diana sigur, at valið fall á kaninir, einamest tí at tað er eitt friðarligt djór, sum eisini kann búgva úti í búri. Húsavørðurin hjá NBH hevur gjørt tvey portur, soleiðis at bæði búfólk, sum megna at ganga sjálvi, og tey sum eru í koyristóli, hava lætta atgongd at koma inn í kaningarðin. Upplivingin at síggja kaninirnar renna runt í garðinum hevur eisini verið ein ómetaliga góð uppliving.