Forfatter: nbh

Sum liður í arbeiðnum fyri at menna tænastuna og arbeiðsumstøðurnar á eldraøkinum, fingu starvsfólk hjá NBH í gjár undirvísing í, hvussu starvsfólk kunnu brúka eina flytilyftir, sum í næstum verða settar upp á Heiminum við Vágna, Sambýlinum á Heygnum og á Røktarheiminum.

Síðani eldraøkið varð lagt út til kommunurnar at umsita, hevur NBH raðfest tætt samstarv millum eitt nú leiðslu og starvsfólk. Ergoterapeutarnir hjá NBH hava í eina tíð víst á, at flytilyftir kunnu gera stóran mun, tá ið talan er um flytistøður, sum m.a. gerast smidligari fyri borgaran, umframt at starvsfólkini fáa nógv betri arbeiðsumstøður.

– Hetta er avgjørt eitt stig rætta vegin, tá hugsað verður um tænastuna til borgaran og arbeiðsumstøðurnar hjá okkara starvsfólkum. Í ár hevur stýrið raðfest pening soleiðis, at 16 kømur kunnu gerast klár til flytilyftir, og í komandi ári verður eisini peningur settur av til enn fleiri flytilyftir. Málið er, at vit framyvir fara at hava møguleika at knýta flytilyftir í allar búeindirnar hjá NBH, sigur Jógvan Skorheim, formaður í NBH.

Tað er danski veitarin Guldmann, ið hevur nógv ár á baki, sum er veitari av hesari tøkni. Til undirvísingina í gjár vístu teir m.a. á, at fyritøkan hevur gjørt eitt stórt kanningararbeiði, ið staðfestir høgt nøgdsemi millum bæði brúkarar og starvsfólk.

Malan Steinhólm og Olivia Mikkelsen, ergoterapeutar í NBH, sum saman við leiðsluni hava arbeitt við hesum átakinum siga, at flytilyftirnar hava nógvar møguleikar, sum gólvlyftin ikki hevur. Eitt nú kann nýggja flytilyftin eisini brúkast tá búfólk, sum eru songjarliggjandi, skulu hava venjing ella røkt. Malan Steinhólm og Olivia Mikkelsen fegnast alsamt um hesa menningina og eru stoltar av, at NBH raðfestir hetta høgt.

Norðoya Bú- og Heimatænasta hevur sett Jónu Østerø í starv sum sjúkrarøktarfrøðing í samdøgursrehabiliteringini á Sambýlinum á Heygnum. Jóna verður partur av einum tvørfakligum toymi, har hon saman við ergoterpeutum og fysioterapeutum hjá Norðoya Bú- og Heimatænastu hevur ábyrgd av samdøgursrehabiliteringini.

Jóna Østerø, sum er kandidatur í sjúkrarøktarfrøði, fer í tøttum samstarvi við ergoterpeutar, fysioterapeutar og røktarstarvsfólkunum á Sambýlinum á Heygnum, at menna tilboðið um samdøgursrehabilitering. Endamálið er m.a. at stuðla fólkapensjónistinum at megna sín egna gerandisdag í tann mun tað ber til, soleiðis at borgarin aftur kann fáa eitt sjálvstøðugt og innihaldsríkt lív.

Samdøgursrehabilitering er skipað sum eitt døgntilboð, sum kann vara í nakrar vikur, men sum krevur, at borgarin eisini hevur eitt ynski um at endurvinna mistar førleikar.
Jóna Østerø er úr Klaksvík. Hon er sjúkrarøktarfrøðingur og hevur júst tikið kandidatsútbúgving í sjúkrarøktarfrøði. Í síni útbúgving hevur Jóna lagt dent á tann eldra medisinska sjúklingin/borgaran bæði innan sjúkrahúsverkið og í kommunalum høpi, og granskaði í hesum sambandi m.a. í NBH.

Jóna tók við starvinum 1. sep. 2019.

Norðoya Bú- og Heimatænasta ynskir Jónu vælkomnari og blíðan byr.

Dagtilhaldið fer í summarfrí 15. juli. Opið verður aftur 19. august 2019.

Starvsfólkini á Dagtilhaldinum ynskja øllum eina góða summarfrítíð.

Seinnapartin í gjár fekk Dagtilhaldið á Heiminum við Vágna eina heilt serliga vitjan. Kristian Skorheim, sum einans er 11 dagar gamal, var boðin til seinnpartskaffi saman við mammu og pápa sínum, Vígdis og Jógvan Skorheim, tí ein heilt serlig gáva bíðaði Kristiani.

Tað var ikki ein sørt rørdur borgarstjóri, sum í gjár saman við konu síni Vígdis tók ímóti einum sera flottum bundnum teppi, sum heimabúgvandi fólkapensjónistar í Norðoyggjum, sum hittast í Dagtilhaldinum, høvdu gjørt.

Hugskotið til gávuna kom, tá Thyra Frank, ráðharri í eldramálum fyrr í ár vitjaði á dagtilhaldinum saman við Jógvani Skorheim, borgarstjóra og stýrisformanni í NBH.

Thyra Frank var sera bergtikin av hondarbeiðinum, og hildu ídnu bindikonurnar, tá tær høvdu frætt at borgarstjórin skuldi gerast pápi fyri aðru ferð, at nýføddi sonurin skuldi fáa eitt líknandi teppi. Vanliga verður bundið úr restum, men til hesa serstaku gávu varð gjørt eyka burturúr, so teppi bleiv so bleytt og fjálgt sum til ber.

Í húgvu, hosum og fjálgum teppi fingu tey vitjaandi á dagtilhaldinum høvi til at ynskja Kristiani blíðan byr.

 

Ársfrásøgnin hjá Norðoya Bú- og Heimatænastu fyri 2018 er nú tøk og kann lesast her.

 

Hvørt húsarhald í Norðoyggjum hevur í dag fingið faldarar, sum kunna borgarar í Norðoyggjum um tilboð og tænastur hjá Norðoya Bú- og Heimatænastu (NBH). Eisini eru fjølbroytt tiltøk til eldri borgarar savnað í einum faldara.

Norðoya Bú- og Heimatænsta hevur síðan eldraøkið varð lagt út til kommunurnar at umsita havt eina heimasíðu, har borgarar fáa kunning um tilboð og tænastur, sum verða veittar borgarum í Norðoyggjum.

Á heimasíðuni www.nbh.fo eru m.a. oyðubløð, sum skulu brúkast, tá ið søkt verður um tænastur frá NBH. Umframt aðra kunning, sum varpar ljós á virksemið hjá NBH, so verður eisini upplýst, hvussu borgarar koma í samband við NBH.

– Eg fegnist um, at hesin faldari nú er komin í hvørt heim í Norðoyggjum, so allir borgarar kunnu fáa kunning um allar tær mongu tænastur, ið vit bjóða okkara eldru borgarum. Tá eldraøkið varð yvirtikið, stungu kommunurnar í Norðoyggjum út í kortið, at eitt av málunum skuldi verða at kunna betri um møguleikarnar, sum samstarvið bjóðar sínum borgarum, sigur Jógvan Skorheim, formaður í Norðoya Bú- og Heimatænastu.

Marna E. Jensen, stjóri í NBH sigur eisini, at fleiri borgarar hava víst áhuga fyri, at kunningin eisini er tøk aðrastaðni enn á heimasíðuni.
-Stýrið fyri NBH hevur samtykt eina visjón, har NBH millum annað skal raðfesta fleksibilitet og samskapan í teimum loysnum, sum skulu mynda eldraøkið. Báðir faldararnir eru framleiddir í samstarvi við

Eldraráðið, sum hevur víst á hendan tørvin, sigur Marna E. Jensen. Hon leggur afturat, at faldarin, sum kunnar um tiltøk til okkara eldri borgarar, er framleiddur og fíggjaður í tøttum samstarvi við Eldraráðið, og eiga tey stóra tøkk fyri tað.

Umframt at nýggju faldararnir verða bornir út til øll húsarhald í Norðoyggjum, so verða teir eisini at finna á heimasíðuni hjá NBH, á Læknamiðstøðini og á Klaksvíkar sjúkrahúsi.

Faldarin, sum kunnar um tilboð og tænastur, kann lesast her
Faldarin, sum kunnar um tiltøk til eldri, kann lesast her

Seinnapartin í gjár undirskrivaðu Jóannes Eidesgaard, formaður í Reyði Krossur Føroya og Maria Olsen, forkvinna í Eldraráðnum í Norðoyggjum undir samstarvsavtalu, sum merkir, at vitjanartænastan í Norðoyggjum verður skipað eftir somu kørmum, sum vitjanartænastan hjá Reyða Krossi, ið hevur fleiri ár á baki.

Við nýggju avtaluni verður arbeiðið hjá vitjunartænastuni í Norðoyggum lagt í eina trygga legu. Harumframt fáa nýggir vitjanarvinir í Norðoyggjum bjóðað ókeypis skeið í fyrstuhjálp, umframt onnur viðkomandi skeið, sum kunnu hjálpa og stuðla undir tí týdningarmikla arbeiðinum, sum vitjunarvinirnir gera ólønt.

Maria Olsen bjóðaði vælkomin, og byrjaði við at heiðra vitjanarvinunum í Norðoyggjum, sum vóru møtt í Smæruni í sambandi við at avtalan skuldi undirskrivast.

Eyrith Guttesen Leyni, nevndarlimur í Reyði Korssur Føroya luttók eisini. Hon greiddi m.a. frá, hvørji krøv eru knýtt at uppgávuni, tá ein skal gerast vitjanarvinur. Hon vísti eisini á góða samstarvið, sum Reyði Krossur Føroya hevur við t.d. nú eldrabúðstovnar.

Poul Havn, sum hevur verið vitjunarvinur í fleiri ár, segði eisini frá sínum roydum sum vitjunarvinur, har hann m.a. hevði sum vana at lesa bæði nýggj og gomul tíðindabløð fyri sínum vitjanarvini. Poul vísti eisini á, at ein slík tænasta bæði gleðir tann sumarm vitjar og tann sum fær vitjan.

Jóannes Eidesgaard, formaður í Reyði Krossur Føroya heilsaði eisini vitjanarvinunum í Norðoyggjum. Hann vísti m.a. á stóra tørvin á vitjanarvinum kring alt landið, men fegnaðist um ta arbeiðið, sum verður gjørt og segði, at eitt slíkt arbeiði bara gerst betri við árunum, tí viljin til at gera nakað gott økist avgjørt við einari slíkari skipan.

Til seinast greiddi demenstoymið hjá Norðoya Bú- og Heimatænastu frá, hvussu vitjanarvinir á besta hátt kunnu møta teimum eldru, tá ið tey fara á vitjan. Nógv av teimum eldru, sum vitjað verður hjá, hava fingið staðfest eina demenssjúku, og tá er tað alt avgerðandi, at vitjanarvinirnir eru nærverandi.

Í demenstoyminum starvast Burna Hentze, Ingrid Heinesen og Kristvør Svarvadal.

MieBeth hevur í dag hátíðarhildið sín 100 ára føðingardag. Hópin av fólki vóru komin at heiðra MieBeth á hesum heilt serliga degi, sum familjan segði seg hava bíðað eftir tey seinastu tvey árini.

Føðingardagurin varð hildin í virkishúsinum Smæran. MieBeth hevur í mong ár búð á Sambýlinum á Heygnum. Hon var nevnliga ein av teimum fyrstu, sum búsetti seg á sambylinum, tá heimið lat upp.

Sólgerð Vang, deildarleiðari á Sambýlinum á Heygnum, bjóðaði vælkomin og harumframt hildu Eyðgunn Samuelsen, landsstýriskvinna í almannamálum, og Jógvan Skorheim, borgarstjóri og stýrisformaður í Norðoya Bú- og Heimatænastu, røður.
Millum gestirnar var eisini Jógvan Fríðriksson, bispur, sum í hesum høpi mintist aftur á løtur, tá hann sum prestur plagdi at búgva hjá MieBeth úti í Fugloy, tá hann var búsitandi á Viðareiði og virkaði sum prestur m.a. í Fugloy.
Røður og sangur settu ein heilt serligan dám á hátíðarløtuna. Eyðsýnt varð eisini, at MieBeth gjørdist bilsin og glað, tá ríkisumboðið kom við einari heilsan frá Drotning Margrethu.
Niðanfyri endurgeva vit røðuna hjá Jógvani Skorheim, borgarstjóra og stýrisformanni í Norðoya Bú- og Heimatænastu:

***

Góða Miebeth
Tað er mær ein sera stórur heiður at bera tygum eina heilsan á tygara 100 ára føðingardegi.
Orsøkin, til at eg sleppi at bera tygum hesa heilsan, er tann, at eg eri formaður í stýrinum fyri Norðoya Bú- og Heimatænastu, sum hevur ábyrgdina av eldratænastunum í Norðoyggjum.
Men vit bæði hava nakað meir enn hetta til felags, tí vit bæði eru nevniliga bæði tvey sannførd sjálvstýrisfólk, og tað ger tað bara enn hugaligari fyri meg at halda talu fyri tygum.

Góða Miebeth
Hetta er ein stórur og heilt serligur dagur, tí tað er ikki á hvørjum degi, at ein 100 ára føðingardagur verður hildin.
Bíblian sigur, at “lív okkara varir 70 ár – ella 80 ár, tá ið styrkin er nógv”, so vit kunnu í dag staðfesta, at HARRIN hevur givið tygum nógva styrki, tí tygum hava nátt sonnum kempualdri.
Sjálvur eri eg einans 36 ár, so tygum hava livað umleið 3 ferðir tað, sum eg havi livað, og tygara royndir og lívsvísdómur er sjálvsagt eisini fleiri ferðir størri enn mín.

Eg kann bara ímynda mær, hvussu nógv ymiskt tygum hava upplivað í hesi 100 árini, og hvussu nógv er broytt síðani 1919, tá ið fyrru veraldarbardagi júst var liðugur.
Tað er so ómetaliga nógv, sum er komið, síðan tygum vóru smágenta úti í Fugloy.
Telefonin, elektrisitetið, ljós, sentralvarmi, vaskimaskina, komfýrur, vegir, bilar, teldur, fartelefonir o.s.fr.

At vera vaksin upp á Fugloynni er eisini nakað heilt serligt, tí hendan vakra oyggj okkara, liggur jú so avsíðis, og hetta hevur kravt nakað eyka av tykkum, sum har búðu og virkaðu. At klára seg sjálvan og at geva sítt íkast til samfelagið og at koma hvørjum øðrum til hjálpar, tá ið tørvur var á tí.
Vit kenna jú eisini nógvar persónar av Fugloynni, sum hava givið hesum samfelag nógv. Ikki minst eru tað nógvir fugloyingar, sum hava verið og eru partur av tí menning, sum Klaksvík hevur verið fyri.
Í dag er íbúgvaratalið á Fugloynni ikki so stórt, men oyggin er hinvegin blivin ein forkunnug oyggj, ikki minst í sambandi við ferðavinnuna.

Tygum eru fødd á Kirkju í 1919 um sama mundið sum 11 mans á Hestoynni sjólótust, sum vit eisini minnast í hesum døgum, og sum vit hoyrdu um í útvarpinum í dag.
Tygum vita sjálvandi nógv betur enn eg, at soleiðis er lívið. Tað bjóðar okkum bæði gaman og álvara, bæði gleði og sorg – tá er gott at eiga Hann at fara til, sum øllum valdar, og sum ikki blundar og ikki svevur.

Tað er so nógv, vit ikki kunnu gera nakað við, men tað er tó eitt, vit hava ávirkan á, og tað er, hvussu vit sjálvi hugsa, hvat vit siga og hvussu vit eru ímóti øðrum menniskjum.
Tygum vóru millum tey fyrstu, sum í 2003 fluttu inn her á Sambýlið á Heygnum, tá ið tað lat upp fyri fyrstu ferð, so tygum eru væl kend her millum starvsfólkini og hini búfólkini.
Eg veit frá teimum, sum starvast her á sambýlinum, at tygum eru ein serliga virðiliga kvinna, og tí hava starvsfólkini og leiðslan her ómetaliga stóra virðing fyri tygum.
Tygum hava sjálvandi upplivað og verið saman við nógvum ymiskum fólkum í ymiskum umstøðum, men tey hava sagt mær frá, at tygum hava tann framúr góða eginleika, at tygum behandla øll menniskju líka, uttan mun til, hvørji tey eru, ella hvussu tey eru fyri.
Víðari siga tey fyri mær, at tygum eru lítillátin, fyrimyndarlig og fitt – tað er ikki eiti á skoðsmáli at fáa, og eg eri glaður fyri at sleppa at bera tygum hesa uppibornu heilsan.

Góða Miebeth
Eg ynski tygum hjartaliga tillukku við 100 ára føðingardegnum.
Takk fyri tað góðu fyrimynd, sum tygum eru fyri okkum onnur.
Harrin signi tygum
Hjartaliga til lukku.

***

Samstarv er komið í lag ímillum Norðoya Bú- og Heimatænastu og skúlanæmingar á Skúlatrøð, sum í næstum fara at vitja á øllum bústovnunum, har tey fara at lesa fyri teimum eldru.

Í farnu viku vóru næmingar á Skúlatrøð til undirvísing í Búðatrøð, sum er dagtilhald fyri heimabúgvandi borgarar í Norðoyggjum, sum hava fingið staðfest eina demenssjúku. Burna Hentze, sum starvast sum sjúkrarøktarfrøðingur, og Ingrid Heinesen, sum starvast sum heilsurøktari á dagtilhaldinum, undirvístu næmingunum í, hvussu tey á besta hátt kunnu møta teimum eldru, tá ið tey í næstum fara á vitjan. Í hesum sambandi framførdu tær ein stuttan skemtileik, sum gav eina góða mynd av støðum, sum næmingarnir møguliga koma at uppliva.

Marna E. Jensen sigur, at endamálið við hesum átakinum m.a. er, at koma nærri visjónini hjá NBH, sum er at bjóða eldru borgarunum fjølbroytt tilboð. NBH hevur tveir samskaparar í starvi, sum hava til uppgávu at geva borgarum, sum búgva á bústovni, ein innihaldsríkan gerandisdag. Marna E. Jensen sigur, at hetta átakið avgjørt fer at stuðla undir virksemið, sum longu er, og leggur afturat, at nøkur av búfólkunum av og á eisini fáa vitjan av børnum á dagstovnaøkinum.

Ungu genturnar, sum vóru møttar til undirvísing hendan dagin, søgdu seg allar vera spentar til uppgávuna, og hildu, at tað heilt sikkurt fór at vera spennandi og læruríkt. Bæði í mun til at menna lesiførleikan, men eisini at fáa góðan lærdóm, hvussu vit eiga at vera saman við eldri, sum m.a. at hava fingið staðfest demenssjúku.

Skipað verður fyri upplestri aðru hvørja viku, tá tveir næmingar saman vitja á ymisku bústovnunum.

 

 

 

 

 

 

 

 

 

 

Starvið, sum kost- og føðslustarvsfólk er nýtt starv, og er ein liður í einari nýggjari tilgongd, har matarskipanin verður miðsavnað í einum nýggjum køki, sum er ætlaður endamálinum um, at góðskutryggja matarskipanina á Heiminum við Vágna.

Hennilena Jacobsen hevur drúgvar royndir sum kost- og føðslustarvsfólk. Hon varð útlærd í 1977 og hevur starvast innan økið líka síðan. Hennilena Jacobsen hevur roynt nógv ymiskt á síni starvsleið, men hetta starvið verður heilt serstakt, sigur hon.

-Tað er sera spennandi, at fáa møguleika at vera við í hesi tilgongdini frá byrjan. Eg haldi, at tað hevur stóran týdning, at maturin verður gjørdur á staðnum. Tú fært fylgt neyvt við tørvinum, sum kann vera sera ymiskur hjá búfólkunum. Tí fari eg at brúka fyrstu tíðina til at kunna meg um tørvin hjá búfólkunum. Hannilena Jacobsen leggur afturat, at góðu umstøðurnar gera tað eisini møguligt at gera matin frá grundini, og tað er avgjørt við til at tryggja góðskuna.

Katrin Hansen, deildarleiðari á Heiminum við Vágna, fegnast eisini um broytingina, sum nú verður framd. Røktarstarvsfólkini, sum áður hava tikið sær av hesi uppgávuni, kunnu nú í størri mun hugsavna seg um røktaruppgávuna og samstundis vera vís í, at búfólkini fáa rættan heilsukost, sum verður lagaður til tørvin hjá hvørjum einstakum búfólki.

24 búfólk eru á Heiminum við Vágna. Harumframt eru 8-10 borgarar tilknýttir dagtilhaldinum, Búðatrøð. Somuleiðis koma nakrir borgarar, ið eru knýttir at dagtilhaldinum, til døgurða hvønn mikudag á Heiminum við Vágna.

Síðsta arbeiðið verður nú gjørt, og væntast nýggja umskipanin klár fyrst í marts 2019.