Forfatter: nbh

”Virkin eldri” er vorðið eitt afturvendandi og vælkent hugtak, og sæst tað aftur í býarmyndini, at fólkapensjónistar í Norðoyggjum hava fjølbroyttar møguleikar, tá ið tað kemur til hugna, venjing og samveru.

Alex Sólstein er ein av teimum 40-50 pensjónistunum, sum dúgliga møta til eginvenjing í venjingarhølunum hjá Ven og virka á Kjalarvegnum.

Venjingarhølini eru opin hvønn týsdag og hósdag kl. 9 – 12, og eftir venjingina er altíð ein kaffimunnur at fáa í Smæruni. Hendan hugnaliga samveran eftir venjing hevur stóran týdning fyri hugin, ásannar fyrrverandi skúlastjórin.

– Eg føli so avgjørt væl, at venjingin er heilsufremjandi fyri meg, og eg eri altíð glaður fyri kensluna í kroppinum, tá eg havi rørt meg eitt sindur. Men eg má eisini viðganga, at kaffimunnurin og hugnaligu prátini, sum eru í Smæruni eftir venjingina, gera hugin at koma til eginvenjing enn betur, sigur Alex Sólstein við einum smíli. Tað er brúkararáðið fyri virkishúsið Smæruna, sum sjálvboðin skipa fyri kaffimunninum.

Eginvenjingin er eitt tilboð hjá Norðoya Bú- og Heimatænastu, men tað eru tey eldru sjálvi, sum stýra venjingini. Hóast starvsfólkini hjá NBH eisini eru til staðar og til reiðar at vegleiða teimum, sum koma til eginvenjing, so eru eldru borgararnir sjálvir óførir at leggja hvørjum øðrum lag á. Umframt at vera tøk til vegleiðing, standa hesi starvsfólkini eisini fyri ergo- og fysioterapi tænastuni hjá Norðoya Bú- og Heimatænastu.

Gerda Arge kennir eisini væl til hetta, at hugni og samvera hevur stóran týdning fyri hugin til at fara til venjing. Hon er fastur gestur í Svimjihøllini, tá eldrasvimjing er á skránni har hvønn leygarmorgun. Vanliga møta eini 20 – 30 fólk til eldrasvimjing, og eisini her verður hugnin og samveran sett í hásæti.

– Vit svimja, drekka kaffi, njóta góðu umstøðurnar í svimjihøllini og geva okkum góða tíð til sauna. Tað kennist fyribyrgjandi, tá hørðu strálurnar í baðilandinum mýkja vøddarnar, og tí eru vit eisini sera spent til nýggi vælverudepilin opnar, sigur Gerda, sum viðmælir øðrum at royna tilboðið.

Endaleysir møguleikar
Eginvenjingin í Ven og virka og eldrasvimjingin í Klaksvíkar svimjihøll eru bert tvey dømi um møguleikarnar fyri einum virknum aldurdómi. Umframt tilboðini og tænasturnar, sum Norðoya Bú- og Heimatænasta veitir, er eisini ein ørgrynna av øðrum tiltøkum og tilboðum til eldri.

Til dømis hava Klaksvíkar kvøldskúli og Handarbeiðsskúlin fyri stuttum kunngjørt vetrarskránna, har fleiri serlig tilboð eru ætlað eldri borgarum, og harumframt eru eisini fleiri afturvendandi tiltøk í Norðoyggjum, sum nógv eldri vitja og brúka javnan. Til ber at kunna seg nærri um nøkur av mongu tilboðunum her.

Um eginvenjing og eldrasvimjing
Eginvenjing er eitt ókeypis tilboð, sum Norðoya Bú- og Heimatænasta veitir øllum fólkapensjónistum í Norðoyggjum. Eginvenjingin fer fram í Ven og virka á Kjalarvegi 48, týsdagar og hósdagar kl. 9 – 12 (halgidagar og frídagar undantiknir).

Eldrasvimjing er tilboð í Klaksvíkar svimjihøll hvønn leygarmorgun kl. 9 – 10. Í hesum tíðarskeiði er svimjihøllin bert opin fyri pensjónistum, men til ber eisini at svimja, tá svimjihøllin annars er opin fyri almenninginum.

Atgongd til svimjihøllina kostar 20 kr fyri fólkapensjónistar, og til ber eisini at keypa sær 20- ella 10-túrakort til pensjónistar fyri ávíkavist 350 ella 190 kr.

Síðan í januar í ár hevur Norðoya Bú- og Heimatænasta bjóðað heimabúgvandi fólkapensjónistum í Norðoyggjum eitt nýtt tilboð, sum skal stuðla teimum, ið hava fingið afturgongd í førleikastøðuni, at endurvinna mistar førleikar.

Ein av teimum, sum higartil hevur fingið gleði av nýggja tilboðnum, er Magnus Mikkelsen. Hann hevur verið knýttur at tænastuni seinastu fýra vikurnar. Hóast Magnus var skeptiskur at byrja við, so hevur hann verið glaður fyri tilboðið.

– Skipaðu venjingarnar tvær ferðir um dagin, saman við ergo- og fysioterapeutunum og heilsugóði kosturin, hevur avgjørt styrkt meg seinastu tíðina, sigur Magnus. Hann leggur aftrat, at tá ið viðgerðin nú er liðug, so fer hann at halda fram í Ven og Virka, sum er venjingarhøli hjá Ergo- og fysioterapieindini í NBH. – Tað hevði eg ikki trúð fyri eini tíð síðani, sigur Magnus við einum smíli

Samdøgursrehabilitering er eitt døgntilboð, sum kann vara í nakrar vikur, men sum krevur, at borgarin eisini hevur eitt ynski um at endurvinna mistar førleikar. Høvuðsendamálið við tænastuni er at stuðla fólkapensjónistinum at megna sín egna gerandisdag í tann mun tað ber til, soleiðis at borgarin aftur kann fáa eitt sjálvstøðugt og innihaldsríkt lív.

Sostatt snýr rehabilitering á eldraøkinum seg um, at tann eldri er í miðdeplinum, sjálvur setur sær mál fyri rehabiliteringina, og at fakfólkini taka støði í gerandisvirkseminum hjá eldru borgarunum.

– Hetta hevur stóran týdning fyri tann eldra borgaran, siga starvsfólkini í rehabiliteringstoyminum, og leggja aftrat, at hond verður tikin um alla lívsstøðuna hjá borgaranum, tá ið førleikastøðan skal betrast.

Samdøgursrehabiliteringin er staðsett á Sambýlinum á Heygnum við tveimum plássum og er skipað við einum tvørfakligum toymi. Í toyminum eru ergoterpeutar, fysioterapeutar og sjúkrarøktarfrøðingur. Heilsustarvsfólk á sambýlinum eru somuleiðis virkin í endurvenjingartilgongdini allan sólarkringin.

Meira kunning um tilboðið Samdøgursrehabilitering er at finna her.

Myndirnar eru av virknum eldri, sum javnan vitja venjingarhøli hjá Ergo- og fysioterapieindini í NBH.

Sum ein liður í arbeiðnum fyri at menna tænastuna og arbeiðsumstøðurnar á eldraøkinum, eru Norðoya Bú- og Heimatænasta og føroyska fyrtøkan TechCare farin í samstarv um verkætlan við atliti til vælferðatøkni á eldraøkinum.

Jóannes Norðberg Poulsen, sum er techno-antropologur og hevur royndir við vælferðatøkni á eldraøkinum, er settur í verkætlanarstarv í eitt hálvt ár, har hann saman við brúkarum, avvarðandi og starvsfólkum á eldraøkinum fer at kanna tørvin á vælferðatøkni innanfyri tænastuøkið hjá NBH. Síðani verður tøkni, sum TechCare mennir og framleiðir roynd í verki. Tað kann t.d. vera tøkni, ið kann staðfesta eitt fall, eld ella annað og tøkni til sporing umvegis GPS.

Vælferðatøkni fevnir um nógv ymisk hjálpartól, sum á ymsan hátt hava til endamáls at gera eldri borgarar meira sjálvhjálpnar og harvið eisini skapa fleiri møguleikar og øktan tryggleika fyri bæði brúkarar og avvarðandi, og hetta kann eitt nú vera við til at gera tað møguligt og trygt hjá eldri borgarum at verða búgvandi longri í egnum heimi.

Harumframt kann vælferðatøkni stuðla undir arbeiðið hjá starvsfólkum á eldraøkinum og hækka støðið á tænstunum til borgaran, bæði í heiminum og á bústovnum.

Samband kom í lag millum Jóannes Norðberg Poulsen og NBH á tiltakinum ”Kom og fanga okkum”, sum MFS skipaði fyri fyrr í ár, og verkætlanin er nú á byrjanarstøðinum, har Jóannes saman við starvsfólkunum hjá NBH fær innlit í arbeiðsuppgávurnar, og harvið eisini hvørjar avbjóðingar vælferðatøkni møguliga kann hjálpa ella stuðla undir við.

Verkætlanin er liður í visjónini hjá NBH, sum m.a. er at skapa fjøltáttaðar møguleikar fyri nærveru, eldru borgarum, avvarðandi og starvsfólkum at gagni, umframt at raðfesta fleksibilitet og samskapan í teimum loysnum, sum skulu finnast á eldraøkinum.

Norðoya Bú- og Heimatænasta hevur sett Katrin Hansen í starv sum deildarleiðara á Heiminum við Vágna frá 1. juli 2018.

Katrin gjørdist sjúkrarøktarfrøðingur í 2005, og hevur starvast innan eldraøkið í fleiri ár. Hon hevur fjølbroyttar royndir í sjúkrarøkt, og hevur í síni yrkisleið eisini verið ein virkin partur av leiðsluarbeiði.

Í starvinum sum deildarleiðari verður Katrin ein týðandi partur av leiðslutoyminum hjá NBH. Hon kemur tískil at hava ein virknan leiklut í menningini av eldraøkinum í Norðoyggjum, til frama fyri bú- og starvsfólk.

Katrin skal harumframt tryggja, at búfólkini á Heiminum við Vágna fáa dygdargóða røkt og umsorgan í heimligum umhvørvi.

Vit ynskja Katrini hjartaliga til lukku, og bjóða henni vælkomnari í starv hjá Norðoya Bú- og Heimatænastu.

Mikukvøldið 13. juni kl. 19.00 verður kafé í Spaniastovu í Klaksvík fyri fólk við demenssjúkum, avvarðandi teirra, starvsfólk innan heilsuøkið, politikkarar, og onnur áhugað.

Les skránna her:

Ver vælkomin.

Við heitinum: “Kom og fanga okkum” varpar MFS – Meginfelag Froyska Studenta ljós á starvslestur og lestrarstørv.

Á ráðstevnuni verður møguleiki hjá tí lesandi at fanga føroyskar arbeiðsgevarar, soleiðis at møguligt samstarv kann samantvinna tey lesandi og føroysku stovnarnar.

Faklig menning hevur høga raðfesting fyri virksmið hjá NBH. Áhaldandi starvsfólkamenning og tætt samstarv við lesandi og næmingar er tí í dag ein týdningarmikil partur av dagliga virkseminum á økinum.

Eldraøkið eigur at vera í støðugari menning, og tí er tað eitt áhaldandi ynski, at ung lesandi kunnu geva Norðoyggjum íblástur, og vera við til at samskapa og menna tær loysnir, ið framyvir skulu finnast á eldraøkinum.

Heilt ítøkiliga kann NBH bjóða teimum lesandi spennandi feriustørv og samstarv um uppgávuskriving, og tí gleða vit okkum at hitta tey vitjandi á ráðstevnuni til eitt prát um starvsmøguleikar og samstarv um eitt nú uppgávuskriving og starvsvenjing.

Í dag var almenn móttøka í Umsorganarheiminum Gloria, har fyrstu búfólkini flyta inn mánadagin.

Síðan samkoman Soli Deo Gloria keypti bygningin á Stangavegnum fyri nógvum árum síðan, hevur ætlanin verið at lata upp umsorganarheim fyri fólki við víðfevnandi sosialum trupulleikum, og nú er tann dreymurin loksins vorðin veruleiki.

Eftir drúgt og áhaldandi arbeiði í mong ár, varð endaliga samstarvsavtalan millum stigtakararnar, Almannaverkið og Klaksvíkar kommunu beint fyri jól, og nú flyta fyrstu búfólkini inn.

Sjálvsognarstovnurin Soli Deo Gloria eigur og rekur umsorganarheimið við rakstrarstuðli frá Klaksvíkar kommunu og Almannaverkinum, sum í 2018 hava játtað ávíkavist 1,8 og 2 milliónir krónur.

Í samband við upplatingina bjóðaði Umsorganarheimið í dag til almenna móttøku, har landsstýriskvinnan í almannamálum, Eyðgunn Samuelsen, Jógvan Skorheim, borgarstjóri og stýrisformaður í NBH og Beinta Klakstein, forkvinna í Trivnaðarnevndini eldri og bústaðir, vóru millum røðararnar. Harumframt var vakur sangur og ábit á skránni.

Øll hugleiddu tey um stóra týdningin, Umsorganarheimið Gloria hevur og fær, bæði fyri búfólkini og fyri samfelagið sum heild, tí fjølbroytt bústaðartilboð, sum samanlagt nøkta tann fjølbroytta og skiftandi tørvin í samfelagnum, hava alstóran týdning fyri trivnaðin og vælferðina í føroyska samfelagnum.

Stórur áhugi fyri plássunum
Umsorganarheimið Gloria er bústaðartilboð við átta plássum. Fríbjørg Michaelsen er leiðari á heiminum, og afturat sær hevur hon eitt væl samansett og útbúgvið starvsfólkatoymi. Fleiri umsøkjarar hava longu víst plássunum áhuga, og fyrstu búfólkini flyta sum nevnt inn mánadagin 5. mars.

Fólk, ið ynskja búpláss á umsorganarheiminum, kunnu venda sær til Gloria á telefon 256507 ella avvarðandi heilsumyndugleika, fyri at fáa hjálp til umsókn.

Kelda: Klaksvik.fo

Seinastu dagarnar hevur bygginevndin í Norðoya Bú- og Heimatænastu verið á ferð Danmark og í Reykjavík. Hugt hevur verið eftir ymiskum sløgum av eldraplássum, sum eru tíðarhóskandi og nøkta tørvin hjá bæði brúkarum, avvarðandi og starvsfólkum.

Tørvurin á bústaðartilboðum á eldraøkinum er stórur. Tí kannar bygginevndin í Norðoya Bú- og Heimatænastu nú møguleikar fyri, hvussu tørvurin hjá so nógvum sum møguligt best kann nøktast.

Føroyska ferðaliðið hevur millum annað verið á vitjan á Fremtidens Plejehjem i Aalborg, sum er eitt nýtt røktarheim, ið hevur raðfest vælferðartøkni í síni bygging. Teirra royndir vísa, at sjálvræði hjá búfólkunum hevur stóra ávirkan á teirra trivnað, og her er vælferðartøknin eitt hent amboð, sigur Lars Nøhr, ið er stjóri á Fremtidens Plejehjem.

Í Reykjavík og í Danmark hava tey ymiskar bústaðarmøguleikar. At veita ymisk bústaðartilboð í mun til tørv, er nakað Marna E. Jensen, leiðari fyri Norðoya Bú- og Heimatænastu, heldur verða áhugavert.Eitt rák sum eisini sæst í Danmark og í Reykjavík er, at fleiri av búplássinum sameina bústaðar – og tænastutilboð, sum ger bústaðarumhvørvi áhugavert hjá øllum borgarum. Tankin um at samband er millum borgara og búfólk á hendan hátt kann styrkjast, er eisini nakað sum vit fara at taka við í okkara eftirmeting, sigur Marna E. Jensen.

Eisini Jógvan Skorheim, borgarstjóri vísir á, at tað hevur týdning, at vit fáa tíðarhóskandi bústaðartilboð, tí hevur tað verið áhugavert at sæð, hvussu okkara grannar skipað eldraøkið. Vit ynskja at fáa íblástur, men tað hevur sera stóran týdning fyri okkum, at loysnin vit velja er tillaga okkara heimligu viðurskifti, sigur Jógvan Skorheim.

Eftir ætlan kann gongd koma á byggingina seint í 2019.

Í bygginevndini eru Jógvan Skorheim, Hans Jákup Kallsberg, Tummas Eliasen, Heri Hammar, Marna E. Jensen, Sunnuva á Lakjuni, Hedvig Matras og Svend Sivertsen.