Kategori: Tíðindi

Seinnapartin í dag var 10 ára hátíðarhald í Ven og Virka. Vegna koronu varð hátíðarhaldið skipað fyri innbodnum, sum hava havt eitt serligt tilknýti til Ven og Virka. Stýrisformaðurin í NBH, Jógvan Skorheim, og Marna E. Jensen, stjóri í NBH, hildu røður. Harumframt greiddu starvsfólk í Ven og Virka frá søguni og virkseminum. Eisini var ábit og tónleikur, og til seinast fekk Ven og Virka eitt flott gávubræv frá áhugabólkinum fyri eldri áljóðandi 30.000kr.

Stórur áhugi at venja

Ynskið at venja er seinastu árini vorðið størri enn kravið um at venja. Hetta sigur Hedevig Matras, deildarleiðari seinastu 10 árini í Ven og Virka, sum er venjingarhølið hjá Fysio- og ergoterapieindini í Norðoya Bú- og Heimatænastu.

Hóast venjingartilboðið í Ven og Virka einans hevur 10 ár á baki, so hevur henda tænasta ment seg so mikið nógv, at nú eru umleið 400 borgarar árliga, ið gera brúk av hesum møguleika.

– Tá ið vit byrjaðu her fyri 10 árum síðan, var høvuðsendamálið at hjálpa teimum, sum høvdu fingið afturgongd í førleikastøðuni. Tað er tað framvegis í dag, men við tí menning, sum er farin fram, er tænastan nógv meira fjølbroytt, enn hon var, tá vit byrjaðu. Vit eru fleiri starvsfólk og eru samansett við fleiri ymiskum fakbólkum.

– Hetta hevur avgjørt styrkt okkara tænastu og ger, at vit kunnu bjóða fleksiblar tænastur. Málbólkurin hjá okkum er heimabúgvandi fólkapensjónistar, sum av einari ella aðrari orsøk hava fingið afturgongd í førleikastøðuni, og ynskja at betra virkisførleikan við venjing. Somuleiðis bjóða vit fólkapensjónistum ókeypis eginvenjing, har borgarar sjálvir standa fyri venjingini.

– Tað er sera gleðiligt at síggja, hvussu íðin tey eldru eru, sum koma til hesar venjingarnar. Tey merkja veruliga mun, tá ið tey venja, samstundis sum samveran lívgar tey upp. Tí hóvar tað teimum ikki væl, at venjingarmøguleikarnir eru vorðnir meira avmarkaðir undir hesi koronufarsóttini, sigur Hedevig Matras.

Rehabilitering er gongda leiðin

Seinastu tvey árini hevur Norðoya Bú- og Heimatænasta bjóðað samdøgursrehabilitering, sum er eitt tíðaravmarkað tilboð, har høvuðsendamálið er at stuðla fólkapensjónistum at megna sín egna gerandisdag í tann mun, tað ber til.

Rehabilitering á eldraøkinum snýr seg um, at tann eldri er í miðdeplinum, og sjálvur setur sær mál fyri rehabiliteringina, samstundis sum fakfólkini taka støði í gerandisdegnum hjá borgaranum.

Jóngerð Biskopstø, fysioterapeutur, Jóna Østerø, sjúkrarøktarfrøðingur, og Pernille Frandsen, ergoterapeutur, starvast í Ven og Virka. Tær vísa á, at tvørfakligt toymisarbeiði er alfa og omega, tá ið talan er um rehabilitering. Við at samstarva tvørfakliga ber til at taka hond um alla lívsstøðuna hjá borgaranum, tá ið endurvenjingartilgongdin skal byrja. Hetta er sera týdningarmikið, tá ið mistir førleikar skulu endurvinnast, tí sjáldan er talan bert um ein mistan førleika, ið kann krøkjast til eitt fakøki. Tær tríggjar eru tí ógvuliga fegnar um, at tilboðið um rehabilitering verður raðfest enn hægri í komandi fíggjarári.

Somuleiðis vísa tær tríggjar á, at gransking á hesum øki staðfestir, at rehabilitering bæði er ein tænasta, sum borgarin ynskir fyri at fáa eitt sjálvstøðugt lív, har hann býr heima sum longst, og ein tænasta, sum í síðsta enda eisini er ein fíggjarliga skynsom.

Virknar eldsálir

Støðan var nakað øðrvísi fyri 10 árum síðan, tá ið Ven og Virka á fyrsta sinni lat upp. Eldraøkið var tá undir Almannaverkinum, og tilboð um venjingar til eldri, sum høvdu fingið afturgongd í førleikastøðuni, var ógvuliga avmarkað, tí onki høli var í Norðoyggjum til endamálið. Søgan um Ven og Virka kann tí knýtast at søguni um Sambýlið á Heygnum, har eldsálir gingu undan og fingu kommununa við í leikin um at fáa bygt eitt ellisheim á trøðna, sum var latin kommununi sera bíliga til endamálið í 1945.

Tað var tó ikki fyrr enn í 2003, at Sambýlið á Heygnum var tikið alment í nýtslu. Kvinnurnar, sum gingu undan við at savna pening inn til byggiverkætlanina, eru somu kvinnur, sum vístu á tørvin og á hølið, vit í dag kenna sum Ven og Virka og Virkishúsið Smæran.

Nakrar av hesum kvinnum eru Maria Klein, Kala Lómaklett, Gerda Absalonsen og Amalia Hansen, sum allar hava verið virknar í áhugabólkinum fyri eldri. Gjøgnum henda felagsskap hava tær skipað fyri eini ørgrynnu av tombola og basarum, har peningurin fyrst og fremst fór til byggiverkætlanina og síðani hevur verið latin til ymisk endamál til gagns fyri trivnaðin hjá eldri borgarum. Nevnast kann lyftan millum hæddirnar í Sambýlinum á Heygnum og sjónvarpsskíggin, sum verður brúktur í venjingarhølinum í Ven og Virka.

Maria, Kala og Gerda, sum framvegis eru virknar í áhugafelagnum fyri eldri, dylja ikki fyri, at tað avgjørt er heilsufremjandi at gera sjálvboðið arbeiði.

– Serliga stuttligt er tað, tá ið peningur, sum er komin inn gjøgnum tombola og basarar, tænir einum góðum endamáli. Og so er tað so gleðiligt at minnast aftur á nógvar hugnaligar løtur í sambandi við hesi tiltøk, har nógv ymisk fólk eru møtt, siga tær tríggjar at enda.

Vegna vantandi undirtøku at stilla upp til val til Eldraráðið er freistin at stilla upp longd til 23. oktober 2020 á middegi.

10. november 2020 skal nýtt Eldraráð veljast fyri Norðoyggjar. Endamálið hjá eldraráðnum er at betra og útbyggja sambandið millum eldri borgarar og Norðoya Bú- og Heimatænastu (NBH). Fyri at stilla upp skalt tú sjálvan valdagin vera 60 ár ella eldri. Atkvøtt verður millum persónarnar, sum skrivliga hava boðað kommununi frá, at teir stilla upp.

Viðtøkurnar fyri Eldraráðið í Norðoyggjum, sum vera galdandi frá 2021, kunnu lesast her. Ein av broytingunum í mun til verandi viðtøkur er, at framyvir verður fundarsamsýning latin til tey, ið umboða Eldraráðið.

Lýsing av vali til Eldraráðið 2020 endurlýsing

10. november 2020 skal nýtt Eldraráð veljast fyri Norðoyggjar. Endamálið hjá eldraráðnum er at betra og útbyggja sambandið millum eldri borgarar og Norðoya Bú- og Heimatænastu (NBH). Fyri at stilla upp skalt tú sjálvan valdagin vera 60 ár ella eldri. Atkvøtt verður millum persónarnar, sum skrivliga hava boðað kommununi frá, at teir stilla upp.

Viðtøkurnar fyri Eldraráðið í Norðoyggjum, sum vera galdandi frá 2021, kunnu lesast her. Ein av broytingunum í mun til verandi viðtøkur er, at framyvir verður fundarsamsýning latin til tey, ið umboða Eldraráðið.

 

Talið á vitjandi í Dagtilhaldinum Sóljuni er vaksið sera nógv, og tí er tað sera harmuligt, at vitjunartalið má avmarkast orsaka Covid-19 smittuvandan.

Heitt verður tískil á allar borgarar, sum ynskja at koma í Dagtilhaldið, at boða frá luttøku á tel. 793455.

Virksemið í dagtilhaldinum verður áhaldandi samskipað eftir tilráðing frá Koronuráðgevingini. Neyðug fjarstøða ger, at í løtuni kunnu í mesta lagi 20 fólk kunnu koma hvørja ferð.

Bíðitíð kann koma fyri, um fleiri enn 20 boða frá luttøku.

Í vár flutti Dagtilhaldið í nýggj hølir á Stoyksoyravegi 39, men vegna covid-19, so hevur ikki verið møguligt at skipa fyri almennari móttøku, sum annars var ætlanin.
Nú tamarhald tykist vera fingið á koronasmittuni, nýtti Jógvan Skorheim, borgarstjóri og stýrisformaður í NBH, høvið til at vitja Dagtilhaldið, og markera løtuna við lagkøku.

Aftaná ein langan steðg, orsaka av tilmælunum í samband við koronusmittuna, vóru nógvir eldri borgarar í gjár komnir til hugnaløtu í Dagtilhaldinum Sóljan, sum er dagtilhald fyri allar heimabúgvandi fólkapensjónistar í Norðoyggjum.

Kaffi, køkur, røður og sangur frá Unn og Jón Absalon Østerø settu ein heilt serligan dám á hugnaløtuna, sum varð tillagað umstøðunum og tilmælum frá Pál Veihe.

Annika Vágsheyg, leiðari í Dagtilhaldinum Sóljan, bjóðaði vælkomin og helt eina røðu, har hon m.a. takkaði starvsfólkunum, leiðsluni og stýrinum í NBH fyri, at hava ment og raðfest hetta tilboðið, har talið á vitjandi er vaksið sera nógv síðstu árini.

Eisini Jógvan Skorheim takkaði starvsfólkunum, sum dagliga virka fyri einum innihaldsríkum gerandisdegi fyri okkara eldru borgarum, og vónaði sjálvsagt, at tey fóru at trívast væl við nýggju umstøðurnar.

Marna E. Jensen, stjóri í NBH, rundaði av og segði m.a., at tað er gleðiligt, at NBH áhaldandi kann menna tilboð, sum eru fleksibul í mun til tørvin hjá borgarunum, og at nærveran í hesum tilboði fær hægstu raðfesting.

Til ber at lesa um tilboðið hjá Dagtilhaldinum Sóljan á heimasíðuni nbh.fo

Niðanfyri endurgeva vit røðuna, sum Annika Vágsheyg helt fyri gestunum í Dagtilhaldinum Sóljan seinnapartin í gjár.

***

Vælkomin í Dagtilhaldið Sóljan!

Løtan í dag er komin í lag fyri at markera, at vit hava tikið nýggj hølir í nýtslu á Stoksoyravegi 39. Vit hava longu verið her í eitt hálvt ár, og lagið er sera gott. Her trívast vit væl.

Vegna Covid-19 hava umstøðurnar ikki verið til at halda móttøku, sum vit annars høvdu ætlanir um, men vit hava tillagað okkum umstøðurnar og avmarkað okkum eftir tilmælunum frá Pál Veihe.

Tá ið kommunurnar í Norðoyggjum yvirtóku eldraøkið, varð hetta dagtilhaldið staðsett á Heimið við Vágna og vóru tað tá fá, ið leitaðu sær út har. Undirtøkan var ikki góð og vit hoyrdu fyri, at hølini ikki vóru egnað til slíkt virksemi.

Men tó so, starvsfólkunum at takka, vendi hendan gongdin. Hóast hølisumstøðurnar, gjørdust gestirnir fleiri og hildu tey tað vera sera hugnaligt at koma á Dagtilhaldið.

Starvsfólkini fingu sær soljóðandi motto: Vit vilja vera eitt dagtilhald, har tann eldri borgarin kennir seg væl at koma og kennir seg hoyrdan og sæddan. Har nærveran er í topp og har møguleiki er fyri fleksibiliteti, soleiðis at virksemið verður tillagað eftir tørvinum hjá tí einstaka gestinum.

Starvsfólkini skuldu skjótt avgera at gongdin var góð, men at hølini í Heiminum við Vágna enn vóru óegnað. Við tí øktu undirtøkuni og tí vaksandi vitjunartalinum, gjørdust hølini nú, umframt óegnað, eisini alt ov trong. Dagtilhaldið vísti seg at vera eitt sera gott stað at koma hjá tí eldra og tey fortaldu okkum hvussu glað tey vóru at møta sínum líkum, og hugnaðu tey sær væl. Vit máttu tá ásanna, at okkurt mátti henda soleiðis at hølini gjørdust hóskandi til undirtøkuna.

Loysnin bleiv ein tilgongd at finna eini nýggj høli, og er tað her vit eru nú. Trivnaðurin vísir seg at vera høgur her í nýggju hølunum á Stoksoyravegi 39. Hesi hølini eru vælegnað til virksemið á Dagtilhaldinum.

Vit starvsfólk eru sera takksom fyri, at leiðslan og stýrið í Norðoya Bú -og Heimatænasta hava viðurkent týdningarmikla arbeiðið hjá okkum og hava játtað okkum nýggj hølir. Uttan teirra viðurkenning var einki hent – stóra takk fyri tað!

Karmarnir eru sera snotiligir og her skal ljóða ein stór tøkk til Jacob Paula Jacobsen, JP-EL, ið hevur víst okkum stóra vælvild. Okkara ynskju vórðu tikin við í tekningum og bygging áðrenn arbeiðið varð sett í gongd við góðum kreftum, frá fyritøkunum Norðhús, Signar Kallsberg og Magni Jacobsen – takk!

Gestirnir, ið her koma, hava eisini verið sera stuðlandi og virksom og tað vísti seg av álvara tá ið vit skipaðu fyri innanhýsis navnakapping  í samband við at vit fluttu hølir. Tá sóu vit veruliga hvussu viksom og áhugað tit vóru í ávirkanini til at forma nýggja Dagtilhaldið og var tað sera stuttligt at fylgja við. Nøvnini vóru øll góð, og til dømis kunnu nevnast: Norðborg, Fjálgastova, Fjálgalon, Kristianslon, Kristianshús, Stokkastovan, Nýggja tilhaldið, Sóljukoppur, Sand á

Stongum, Poppastova og Sóljan.

Tað var spennandi at hoyra tykkum, gestir á Dagtilhaldinum, greiða frá og at enda varð navnið ‘Sóljan’ valt. Sóljan varð bæði tað navnið, ið kom oftast fyri í navnakappingini, men eisini varð tað dúgliga greitt frá um, hvussu Sóljan eitt nú er ein blóma, ið birtir tjóðskaparkensluni í tykkum. Víst varð á, at Sóljan blómar um várið, ið minnir tykkum á tá ið tit spældu úti við blómum, runukøkur vórðu pyntaðar við sóljum, sóljukransar vórðu bundnir og nýttir sum hálsprýði, mammurnar fingu blómutyssi við sóljum og flestu vindeygagluggar vóru prýddir við sóljum – Jú, mín sann, navnið Sóljan er meira enn bert eitt navn.

Nú eru vit til hugnaløtu í Dagtilhaldinum Sóljan. Her er hugnaligt og tá ið vit, starvsfólkini, skuldu velja felagssang, vóru vit samd um at syngja Sóljugentusangin og hevði tað glett okkum, um tit vilja syngja við eftir hesa taluna.

Takk fyri, frá okkum starvsfólkum, og eisini takk til øll onnur, sum vit ikki kundu bjóða við í dag vegna Covid smittuni. Vit hava so sera nógv sum koma og hugna um dagtilhaldið við vitjanum, sangum, útferðum, fyrilestrum, andagtum…. Uttan tykkum var ikki møguligt at gera Sóljuna so hugnaliga.

Takk fyri!

Nú fáir tilburðir eru av Koronu og tamarhald tykist vera á støðuni, ber aftur til at vitja á búeindunum í NBH sum vanligt. Tað vil siga, at talið av vitjandi ikki er avmarkað longur, men vitjaninar eru skipaðar eftir ávísum leisti og treytum.

Nærri kunning um núverandi mannagongd fyri vitjan á búeindunum sæst her.

Almennu tilmælini um sosiala samveru og reinføri eru sjálvandi altíð galdandi. Sí her.

Vitjan á búeindunum
Nú ber aftur til at hava seks vitjandi fyri hvørt búfólk.
Nærri kunning um, hvussu vitjaninar verða skipaðar, fæst her.

Nú ber aftur til at vitja á búeindunum eftir ávísum leisti

Í sambandi við at fleiri tilburðir av smittu við koronuvirus vórðu staðfestir fyrst í august-mánaði, varð mett neyðugt at seta smittuverjuátøk í verk, sum m.a. høvdu við sær, at tað ikki var møguligt at vitja á búeindunum í NBH.

Nú tamarhaldið á smittuni tykist vera betri, hava eldraøkini í Føroyum í saman við Pál Weihe, yvirlækna, tikið ta støðu, at tvey avvarðandi hjá hvørjum búfólki aftur kunnu vitja á røktarheimum og eldrasambýlum. Hetta er galdandi frá mikudegnum 19. august 2020.  Sí, nærri kunning um vitjanina her.

Áheitan til avvarðandi um at lata seg kanna

Fyri at forða smittuni at koma inn á búeindirnar, fer NBH staðiliga at heita á avvarðandi um javnan at lata seg kanna fyri COVID-19, serliga áðrenn vitjað verður aftur fyrstu ferð. Kanningartíðirnar síggjast á heimasíðunum hjá teimum trimum sjúkrahúsunum í Føroyum: www.ks.fo – www.ls.fo – www.ssh.fo.
Tað ber somuleiðis til at kanna seg hjá privatu fyritøkuni Thetis, sí vegleiðing her.
NBH fylgir kanningarskráum, ið eru gjørdar fyri starvsfólk, búfólk og heimabúgvandi borgarar við støði í heilsufakligum tilmælum á økinum. Hesar kanningar verða gjørdar í NBH.

Aðrar tænastur í NBH

Aðrar tænastur og tilboð í NBH, so sum Dagtilhaldið Sóljan og virksemið í Ven og Virka hava eisini verið skerd hesa tíðina og byrjað verður varisliga aftur í hesi og næstu viku.
Nærri kunning fæst undir hvørji tænastu sær, sí Tænastur.

Verður latið enn meiri upp?

Alt eftir, hvussu koronasmittan í samfelagnum háttar sær, verður latið enn meiri upp fyri vitjan á búeindunum og øðrum tænastum í NBH.

 

Nú fleiri tilburðir av smittu við koronuvirus eru staðfestir í landinum er neyðugt at seta smittuverjuátøk í verk, so smittan ikki rakar eldri borgarar og onnur, ið eru í vanda fyri at fáa eina álvarsliga sjúkugongd.

Hetta merkir m.a., at tað ikki verður møguligt at vitja á búeindunum í NBH til og við mikudagin 19. august 2020, tá nýggj støða verður tikin.

Eldraøkini í Føroyum hava gjørt felags mannagongd fyri vitjan á búeindum.

Frá 15. juni 2020 verður loyvt seks vitjandi at vera á vitjanarlistanum hjá hvørjum búfólki. Um ynski er um tað, ber til at skifta ein vitjandi út um vikuna.

Almennu tilráðingarnar um frástøðu og reinføri eru framhaldandi galdandi, og tí eru fysisku karmarnir og fermetratal m.a. avgerandi fyri, hvussu nógv kunnu vitja í senn á ymsu heimunum.

Nú landamørkini lata upp aftur, er vandin fyri smittuspjaðing øktur, og tí er somuleiðis neyðugt, at vitjandi framhaldandi lata seg skráseta, so tað ber til at spora møguliga smittu.

Fyri øll vitjandi, sum hava verið uttanlands ella koma úr útlandinum, og líkamikið um talan er um lond, sum myndugleikarnir hava latið upp fyri ella ikki, er hetta galdandi:

– Øll vitjandi, sum koma heim til Føroyar, verða biðin um at bíða við at vitja á ellis- og røktarheimunum/eldrasambýlum fyrstu 14 dagarnar eftir heimkomu

– Eru serligar grundir til, at vitjanin ikki kann bíða í 14 dagar, verður mælt til at bíða við at vitja á ellis- og røktarheimum/eldrasambýlum til 7. dagin aftan á heimkomu og at lata seg testa 6. dagin eftir, at ein er komin til landið